ඇඹිලිපිටියේ ප්‍රසිද්ධ පාසලක 11 වැනි ශ්‍රේණියේ ඉගෙනුම ලබන සිසුවියක් පාසල් වෑන් රථයකදී අතවරයට ලක්කළ එම වෑන් රථයේ රියදුරු සොයා පනාමුර පොලීසිය විමර්ශන ආරම්භකර තිබේ.
මෙලෙස අතවරයට ලක්ව ඇත්තේ සිය පුංචි අම්මාගේ රැකවරණය යටතේ හැදී වැඩුණු දැරියකි.
දැරිය පසුගිය දිනෙක පාසල් නොපැමිණ නිල ඇඳුමෙන් ඇඹිලිපිටිය නගරයේ රැඳී සිටිනු මිතුරියන් දැක ඇති බවට පාසලෙන් ලැබුණු ඇමතුමකට අනුව දැරියගේ ඥාතීන් ඇඹිලිපිටිය මූලස්ථාන පොලීසියට පැමිණිලි කර තිබේ.
ඒ අනුව පොලීසිය එම දැරිය පාසලට පැමිණෙන වෑන් රථයේ රියදුරුට ඇමතුමක් ලබාදී ඔහු ගෙන්වා ප්‍රකාශයක් ලබාගෙන ඇති අතර, එහිදී ඔහු පවසා ඇත්තේ පොත් කිහිපයක් මිලට ගැනීමට අවශ්‍ය බව දන්වමින් දැරිය ඇඹිලිපිටිය නගරයේදී වෑන් රථයෙන් බැස ගිය බවය.
ඔහුගේ ප්‍රකාශය සම්බන්ධයෙන් සැක සිතූ දැරියගේ ඥාතීන් දැරිය සොයාගන්නා තෙක් රියදුරා මුදා නොහරින ලෙස ඉල්ලීම් කළත්, පොලීසිය ඔහුව මුදාහැර තිබේ.
කෙසේ වෙතත් පස්වරුවේ නිවසට පැමිණි දැරිය පවසා ඇත්තේ, ඇඹිලිපිටිය නගරයෙන් පොත් කිහිපයක් මිලදීගත් පසු රියදුරු තමන්ව වෑන් රථයට නංවාගෙන චන්ද්‍රිකා වැව ආසන්නයේ කැලෑබද ප්‍රදේශයට රැගෙනවිත් අතරවරයට ලක්කළ බවය.
ඒ අතරතුර පොලිසියෙන් ඇමතුමක් ලැබුණු පසු ඔහු තමන්ව එහි අත්හැර දමා පිටත්ව ගිය බව දැරිය පවසා තිබේ.
පසුව ඇය ඇඹිළිපිටිය දිස්ත්‍රික් මහ රෝහලේ අධිකරණ වෛද්‍ය නිලධාරියාවරයා වෙත ඉදිරිපත් කෙරුණි.
අදාළ වෑන් රථය පොලිසිය සිය භාරයටගත්තද, විවාහකයෙකු වන 42 හැවිරිදි සැකකාර රියදුරා මේ වන විට ප්‍රදේශයෙන් පලාගොස් ඇති අතර, ඔහු සොයා විමර්ශන ක්‍රියාත්මකය.
Leave a Reply