අද විපක්‍ෂය සටන් පාඨ නැතිව අනාථ වෙලා – ජයන්ත සමරවීර

අද මෙරට විපක්ෂය සටන් පාඨ නොමැතිව අනාථවී ඇති බවත් ඒ නිසා ආණ්ඩුව කොරෝනා මර්දනය සඳහා ගනු ලැබූ සාර්ථක පියවරයන් විවේචනය කිරීමටත් ඒ පිළිබඳ ජනතා විශ්වාසය බිඳ වැට්ටවීමටත් ඔවුන් ඉතා පටු සහ කුහක ආකාරයට කටයුතු කරන බවත් ජානිපෙ ජාතික සංවිධායක ජයන්ත සමරවීර මහතා පවසයි.

අද (17) පිටකෝට්ටේ පිහිටි ජානිපෙ ප්‍රධාන කාර්යාලයේ දී පැවැති මාධ්‍ය හමුවක දී ඒ මහතා එසේ පැවසුවේය.

ලොව බලවත් ම රාජ්‍යයන් කොරෝනා වසංගතය පාලනයට අසමත් වෙද්දී මෙරට සෞඛ්‍ය අංශ පමණක් නොව බුද්ධි අංශ ඇතුළත්ව ආරක්ෂක අංශ ද යොදවා ගනිමින් වසංගතය සාර්ථකව පාලනය කිරීමට අද ආණ්ඩුව සමත්වී ඇති බව පෙන්වා දුන් සමරවීර මහතා, එවැනි තත්වයක් හමුවේ විපක්‍ෂය පෙන්නුම් කළේ ලොව කිසිදු රටක විපක්ෂයක් සිදු නොකරන අන්දමේ පිළිකුල් සහගත භාවිතයක් බව ද සඳහන් කළේය.

ත්‍රිවිධ හමුදාව හා බුද්ධි අංශ, වසංගත රෝග පාලනයට යොදවා ගැනීම වැරදි තීන්දුවක් බව පවසමින් රණවිරුවන්ට මානසික බාධාවක් ඇති කරමින් ද සැබෑ මරණ හා ආසාදිතයන් සංඛ්‍යාව සඟවමින් තොරතුරු වසන් කරනවා යැයි කියමින් ජනතාව තුළ කුකුසක් ඇති කරමින් ද ජනාධිපතිවරයාගේ මුදල් බලතල සම්බන්ධයෙන් අසත්‍ය කරුණු සමාජගත කරමින් ද සිදුකළ පහත් පෙළේ ක්‍රියාවන් නිසා එළඹෙන මහ මැතිවරණයේ දී රනිල් – සජිත් දෙපිළ මිහිදන්වීමත් 3%ක ජනවරමක් හිමිව තිබූ ජවිපෙ අතුරුදහන්වීමත් නිසැක බව හිටපු පරිසර රාජ්‍ය අමාත්‍යවරයා වැඩිදුරටත් සඳහන් කළේය.

ලොවටම ආදර්ශයක් වූ මෙරට කොරෝනා වසංගත පාලන ක්‍රියාන්විතය සම්බන්ධයෙන් ගජබින්න ඇද බෑ විපක්ෂය, ‘කිඹුල් කෝලමක්’ පෙන්වා රටම නොමග යැවූ, මෙරට ඉතිහාසයේ දූෂිත ම සෞඛ්‍ය අමාත්‍යවරයා වූ රාජිත සේනාරත්න වැනි වංචනිකයකු සම්බන්ධයෙන් ගෙන ඇති අධිකරණමය ක්‍රියාමාර්ග දේශපාලන පලිගැනීම් බවට වර ගැන්වීමේ අසාර්ථක උත්සාහයක නිරතව සිටින බව ද සමරවීර මහතා වැඩිදුරටත් පෙන්වා දුන්නේය.

‘සෞභාග්‍යයේ දැක්ම’ යථාර්ථයක් කළ හැකි නැණවත්, ගුණවත්, බලවත් පාලනයක් බිහිකරගැනීම මෙරට බහුතර ජනතාවගේ අභිලාෂය බවත් එය ඉටුකරගත හැකි පරිදි, සෞඛ්‍ය අංශවල අනුමැතිය ලැබුණු වහාම කොවිඩ් – 19 වසංගත තත්ත්වයට අනුරූපී නිර්ණායක ද සහිතව මහ මැතිවරණය පැවැත්වීම සඳහා පියවර ගන්නා ලෙස තම පක්ෂය මැතිවරණ කොමිසමෙන් ඉල්ලා සිටින බව ජානිපෙ ජාතික සංවිධායකවරයා වැඩිදුරටත් පැවසුවේය.

Leave A Reply

Your email address will not be published.